CHE FAIN NUS?
Sco pitschna falegnamaria ans vaina specialisats sülla producziun da mobiglia e pitschnas lavuors da lain pel minchadi. Tuot noss prodots sun aignas creaziuns da DALINI.
Da la prüm’idea, sur il design, il programmar cun 3D, elavurar il lain cun nossas maschinas da CNC, la lavur da detagl a man fin pro’l paquettar, vain tuot fat da nus.
Nus eschan persvas, cha noss prodots fats cun bler entusiassem e paschiun procuran eir pro Els per bler plaschair.
INGIO LAVURAIN NUS?
L’ufficina da DALINI as rechatta a Susch, immez l’Engiadina. Tras quai eschan colliats tant cull’Engidin’Ota sco eir cull’Engiadina Bassa e que ans pussibiltescha bleras nouvas perspectivas.
A Susch ans rechattaina, perquai cha nossa famglia viva e lavura fingià daspö generaziuns quia. La paschiun per lavuors in lain es eir fingià adüna stat üna part da nossa famiglia e perquai pudaina profitar dad üna lunga experienza.
Nus admirain nossas muntognas ed ans eschan consciaints da la richezza ch’ellas ans regalan mincha di. L’Engiadina ans furnischa cun seis gods sans ün lain extraordinari cha nus eschan grats da pudair elavurar.
CO LAVURAIN NUS?
Nos böt principal es dad elavurar materials indigens cun resursas indigenas.
Nus vulain s-chaffir bels ogets pel adöver dal minchadi. La dürabilità da noss prodots farà plaschair tant ad Els sco eir a Lur generaziuns futuras.
Cun elavurar noss prodots in maniera da la Swiss Made Tradition garantina per la buna qualità. Noss prodots ans stan a cour, minchün es unic ed avant co ch’el banduna noss’ufficina eschna cun paschiun landervia.
Nus eschan persvas, ch’ün design classic/etern e buna qualità sun bunas premissas per tgnair chüra da nos ambiaint.
